50. YAA ILAAHI HAR JAGAH TERI ‘ATAA KA SAATH HO
Yaa Ilaahi har jagah teri ‘ataa ka saath ho,
Jub parre mushkil Shahe mushkil Kusha ka saath ho.
Yaa Ilaahi bhool jaoon naz’a ki takleef ko,
Shaadiy-e-deedar-e-husn-e-Mustafa ka saath ho.
Yaa Ilaahi gor-e-teera ki jab aaye sakht raat,
Unke pyaare moonh ki subh-e-jaan fizaa ka saath ho.
Yaa Ilaahi jub parre mahshar me shor-e-daar-o-geer,
Amn dene waale pyaare peshwaa ka saath ho.
Yaa Ilaahi jab zubaanein baahar aayein pyaas sey,
Saahib-e-kauthar shah-e-jood-o-ataa ka saath ho.
Yaa Ilaahi sard muhri par ho jab khursheed-e-hashr,
Sayyid-e-be-saaya key zille-e-liwaa ka saath ho.
Yaa Ilaahi garmi-e-mahshar say jab bharke badan,
Daaman-e-mahboob ki thandi hawaa ka saath ho.
Yaa Ilaahi nama-e-a'maal jub khulne lagein,
Aib posh-e-khalq sattaar-e-khata ka saath ho.
Yaa Ilaahi jab bahe aankhein hisaab-e-jurm mein,
Un tabassum rez honton ki du’aa ka saath ho.
Yaa Ilaahi jab hisaab-e-khanda-e-bejaa rulaaye,
Chashm-e-giryaane shafi-e-murtaja ka saath ho.
Yaa Ilaahi rang laayein jab meri be baakiyaan,
Unki neechi neechi nazron ki hayaa ka saath ho.
Yaa Ilaahi jab chaloon taareek raah-e-pul siraat,
Aftaab-e-Haashmi noor-ul-huda ka saath ho.
Yaa Ilaahi jab sar-e-shamsheer par chalna pare,
Rabbe sallim kehne waale ghamzudah ka saath ho.
Yaa Ilaahi jo Du’aa-e-nek main tujhse karoon,
Qudsiyon key lab say aameen Rabbana ka saath ho.
Yaa Ilaahi jab RAZA khwaab-e-giraan sey sar uthaa'-e-,
Daulat-e-bedaar ‘ishq-e-Mustafa ka saath ho.