2. SUBHA TAIBAH MEIN HUI BAT-TAA HAY BAARA NOOR KAA
Subha Taibah mein hui bat-taa hay baara noor kaa,
Sadqah lenay noor kaa aaya hay taara noor kaa.
Baagh-e-Taiba mein suhaanaa phool phoola noor kaa,
Mast-e-boo hain bulbulein padhti hain kalma noor kaa.
Baarhwein key chaand kaa mujra hay sajdah noor kaa,
Baarah burjon sey jhukaa ek ik sitaarah noor kaa.
Un key qasr-e-qadr sey Khuld eik kamrah noor kaa,
Sidrah paayein baagh mein nanhaa saa pauda noor kaa.
Arsh bhi firdaus bhi uss shaah-e-waala noor kaa,
Yeh muthamman burj woh mushkuw-e-a’laa noor kaa.
Aayi bid’at chaayi zulmat rang badla noor kaa,
Maah-e-sunnat mehr-e-tal’at ley ley badla noor kaa.
Tere hi maathe rahaa aay jaan-e-sehra noor kaa,
Bakht jaaga noor kaa chamkaa sitaaraa noor kaa.
Mein gadaa tu baadshah bhar dey piyaalah noor kaa,
Noor din doonaa tera dey daal sadqah noor kaa.
Teri hi jaanib hay paanchon waqt sajdah noor kaa,
Rukh hay Qibla noor kaa abru hay ka’aba noor kaa.
Pusht par dhalkaa sar-e-anwar sey shamla noor kaa,
Dekhein Moosa Toor sey utraa sahifa noor kaa.
Taaj waaley dekh kar tera ‘imaama noor kaa,
Sar jhukaatey hain Ilaahi bol baala noor kaa.
Beeni pur noor par rakhshaan hay bukkah noor kaa,
Hay liwaa-ul-hamd par urtaa phareraa noor kaa.
Mus-haf-e-aariz pey hay khat-e-shafee’ah noor kaa,
Lo siyahkaaro Mubarak ho qabalah noor kaa.
Aab-e-zar banta hay ‘aariz par paseena noor kaa,
Mus-haf-e-i’jaaz par charhta hay sona noor kaa.
Pech karta hay fida hone ko lam’ah noor kaa,
Gird-e-sar phirne ko banta hay ‘imaamah noor kaa.
Haibat-e-’aariz sey tharraata hay sho’la noor kaa,
Kafsh-e-paa par gir key ban jaata hay guppha noor kaa.
Sham’a dil mishkaat tan seena zujaajah noor kaa,
Teri soorat key liye aaya hay soorah noor kaa
Mail sey kis darja suthraa hay woh putla noor kaa,
Hay gale mein aaj tak kora hi kurtaa noor kaa.
Tere aagey khaak par jhukta hay maatha noor kaa,
Noor ne paaya tere sajde sey seema noor kaa.
Tu hay saaya noor ka har uzw tukrra noor kaa,
Saaya ka saaya nah hota hay nah saaya noor kaa.
Kya bana naam-e-Khuda asraa kaa dulha noor kaa,
Sar pey sehra noor kaa bar mein shahaanah noor kaa.
Bazm-e-wahdat mein mazaa hoga dobala noor kaa,
Milne sham’a Toor sey jaata hay ikka noor kaa.
Wasf-e-rukh mein gaati hain hoorein taraana noor kaa,
Qudrati beenon mein kya bajta hay lehra noor kaa.
Yeh kitaab-e-kun mein aayaa turfa aayah noor kaa,
Ghair-e-qaayil kuch nah samjhaa koi Ma’na noor kaa.
Dekhne waalon ney kuch dekha nah bhaala noor kaa,
Man ra’ aa kaisaa yeh aaina dikhaaya noor kaa.
Subha kardi kufr ki saccha tha muzda noor kaa,
Shaam hi sey tha shab-e-teerah ko dharrka noor kaa.
Parti hay noori bharan umdaa hay daryaa noor kaa,
Sar jhuka aay kisht-e-kufr aataa hay ahlaa noor kaa.
Naariyon ka daur tha dil jal raha tha noor kaa,
Tum ko dekhaa ho gaya thanda kalejaa noor kaa.
Naskh adiyaan karke khud qabza bithaaya noor kaa,
Taajwar ney kar liya kaccha ‘ilaaqah noor kaa.
Jo gadaa dekho liye jaata hay tora noor kaa,
Noor ki sarkaar hay kya isme tora noor kaa.
Bheekh ley sarkaar sey laa jald kaasah noor kaa,
Maah-e-naw Taibah mein bat-ta hay maheenah noor kaa.
Dekh unke hote naa zebaa hay da’waa noor kaa,
Mehr likh dey yaan key zarron ko muchalka noor kaa.
Yaan bhi daagh-e-sajdah-e-Taibah hay tamghaa noor kaa,
Aay qamar kya tere hi maathey hay teekaa noor kaa.
Sham’a saa(n) eik eik parwaanah hay is baa noor kaa,
Noor-e-Haq sey lau lagaaye dil mein rishtah noor kaa.
Anjuman waaley hain anjum bazm-e-halqa noor kaa,
Chaand par taaron key jhurmat sey hay haalah noor kaa.
Teri nasl-e-paak mein hay bacha bacha noor kaa,
Tu hay ‘ain-e-noor tera sab gharana noor kaa.
Noor ki sarkaar sey paaya doshala noor kaa,
Ho mubarak tum ko Zun-Noorain jora noor kaa.
Kis key parde ney kiya aaina andha noor kaa
Maangta phirta hay aankhein har nageenah noor kaa.
Ab kahaan woh taabishein kaisa woh tarrka noor kaa,
Mehr ney chhup kar kiya khaasaa-o-dhundlakaa noor kaa.
Tum muqaabil the to pehron chaand barhta noor kaa,
Tum sey chhut kar moonh nikal aaya zara saa noor kaa.
Qabr-e-Anwar kahiye yaa qasr-e-mo’alla noor kaa,
Charkh-e-atlas yaa koi saadah saa qubba noor kaa.
Aankh mil sakti nahin dar par hay pehra noor kaa,
Taab hay bey hukm par maarey parindah noor kaa.
Naza’a mein lautega khaak-e-dar pey shaida noor kaa,
Mar key awrhegi uroos-e-jaan dupatta noor kaa.
Taab-e-mehr-e-hashr sey chaunke nah kushta noor kaa,
Boondiyaan rehmat ki deney aayin cheenta noor kaa.
Waz’-e-waaze’ mein teri soorat hay ma’na noor kaa,
Yoon majaazan chaahein jis ko keh dein kalma noor kaa.
Ambiya ajzaa hain tu bilkul hay jumla noor kaa,
Is ‘ilaaqe sey hay un par naam sachha noor kaa.
Yeh jo mehr-o-mah pey hay itlaaq aataa noor kaa,
Bheekh tere naam ki hay isti’aarah noor kaa.
Surmagin aankhein hareem-e-Haq key woh mushkin ghazaal,
Hay fazaaye laa makaan tak jinka ramnaa noor kaa.
Taab-e-husn-e-garm sey khil jaayenge dil key kanwal,
Nau bahaarein laayega garmi ka jhalka noor kaa.
Zar-e-mehr-e-quds tak tere tawassut sey gaye,
Had-e-ausat ney kiya sughraa ko kubraa noor kaa.
Sabzah gardon jhukaa tha behr-e-paa bos-e-Buraaq,
Phir nah seedha ho saka khaayaa woh kora noor kaa.
Taab-e-sum sey chaundhiyaa kar chaand unhein qadmon phira,
Hans key bijli ney kahaa dekhaa chalaawaa noor kaa.
Deed-e-naqsh-e-sum ko nikli saat pardon sey nigaah,
Putliyaan bolein chalo aaya tamaashaa noor kaa.
Aks-e-sum ney chaand sooraj ko lagaye chaar chaand,
Par gayaa seem-o-zar-e-gardawn pey sikkah noor kaa.
Chaand jhuk jaata jidhar ungli utthaatey mahd mein,
Kya hi chaltaa thaa ishaaron par khilona noor kaa.
Eik seena tak mushaabeh eik wahan sey paaon tak,
Husn-e-Sibtain un key jaamon mein hay neemaa noor kaa.
Saaf shakl-e-paak hay donon key milney sey ‘iyaan,
Khat tawam mein likha hay yeh do warqah noor kaa.
Kaaf gesu haa dahan yaa abru aankhein ‘ain saad,
Kaaf-haa-yaa-‘ain-saad unkaa hay chehrah noor kaa.
Aay RAZA yeh Ahmad-e-Noori ka faiz-e-noor hay.
Ho gayi meri ghazal barrh kar qaseedah noor kaa.