81. SACHI BAAT SIKHATAY YEH HAIN
Sachi baat sikhatay yeh hain,
Seedhi raah chalatay yeh hain.
Hilti niyuw jamaatay yeh hain,
Tooti aas bandhaatay yeh hain.
Jalti jaan bujhaatay yeh hain,
Rowti aankh hansaatay yeh hain.
Rab hay mu’tee yeh hain Qaasim,
Rizq uss ka hay khilaatay yeh hain.
Us ki bakhshish in ka sadqa,
Detaa woh hay dilaatay yeh hain.
Inna a’ataina kal kowthar,
Saari kathrat paatay yeh hain.
Thanda thanda meetha meetha,
Peetay ham hain pilaatay yeh hain.
Naz’a -e- rooh mein aasaani dain,
kalima yaad dilaatay yeh hain.
Marqad mein bandon ko thapak kar,
Meethi neend sulaatay yeh hain.
Maa jab iklotay ko choray,
Aa aa keh kar key bulaatay yeh hain.
Sallim sallim ki dhaaras say,
Pul say paar chalaatay yeh hain.
Apnay bharam say ham halkon ka,
Palla bhaari banaatay yeh hain.
Apni bani hum aap bigaarain,
Kaun banaaye banaatay yeh hain.
Rangay be rangon ka pardah,
Daaman dhak kay chupaatay yeh hain.
Raafi’ naafi’ shaafi’ daafi’,
Kya kya rahmat laatay yeh hain.
Faiz-e-jaleel khaleel say poocho,
Aag mein baagh lagaatay yeh hain.
In key haath mein har kunji hay,
Maalik-e-kul kehlaatay yeh hain.
Qasr-e-dana tak kis ki rasaai,
Jaate yeh hain aate yeh hain.
Keh do RAZA sey khush ho khush reh,
Muzda RAZA ka sunaatay yeh hain.