45. CHAMANE TAYBAH MEIN SUMBUL JO SAWAARE GESU
Chamane Taybah mein sumbul jo sawaare gesu,
Hoor barh kar shikane naaz pe ware gesu.
Ki jo baalon sey tere rauze ki jaaroob kashi,
Shab ko shabnam ne tabarruk ko hay dhare gesu.
Hum siyaah kaaro pe Yaa Rabb tapish-e-mahshar mein,
Saaya afghan ho tere pyaare key pyaare gesu.
Charche hooron mein hain dekho to zara baal-e-burraaq,
Sumbul-e-khuld key qurbaan utaare gesu.
Aakhir hajj gham-e-ummat mein pareshaan ho kar,
Teerah bakhto ki shafa’at ko sudhaare gesu.
Gosh tak sunte thay fariyad ab ayay taa dosh,
Ke bane khaana badoshon ko sahare gesu.
Sookhe dhano pe humare bhi karam ho jaye,
Chhaye rehmat ki ghataa ban key tumhare gesu.
Ka’aba-e-jaan ko pehnaya hay ghilaafe mushkeen,
Ur kar aaye hain jo abroo pe tumhare gesu.
Silsila paake shafa’at ka jhuke parte hain,
Sajda-e-shukr key karte hain ishaare gesu.
Mushk boo koocha yeh kis phool ka jhaaraa in sey,
Hooriyo ambare saara huwe saare gesu.
Dekho Qur’an mein shab-e-qadr hay taa matla-e-fajr,
Ya’ani nazdik hay aariz key woh pyaare gesu.
Bheeni khushboo sey mehak jaati hain galiyan wallah,
Kaise phoolon mein basaaye hain tumhare gesu.
Shaan-e-rehmat hay key shaanah na juda ho dam bhar,
Seena chaakon pay kuch iss darjah hain pyaare gesu.
Shaana hay panja-e-qudrat teray baalon key liye,
Kaise haathon ne shahaa terey sanware gesu.
Uhd-e-paak ki choti sey ulaj le shab bhar,
Subah hone do shabe eid ne haare gesu.
Muzda ho qibla sey ghanghoor ghataayein umdeen,
Abruon par woh jhuke jhoom key baare gesu.
Taare shiraazah majmuah-e-kaunain hay ye,
Haal khul jaye jo ek dam hon kinaare gesu.
Tel ki boondein tapakti nahin baalon sey RAZA,
Subhe aariz pe lutatey hain sitaare gesu.