72. SOONA JUNGLE RAAT ANDHERI CHAAYI BADLI KAALI HAY
Soona jungle raat andheri chaayi badli kaali hay,
Sone waalo jaagte rahiyo choron ki rakhwaali hay.
Aankh sey kaajal saaf churaa lain yaan woh chor balaa key hain,
Teri gatthrri taakee hay aur tu ne neend nikali hay.
Yeh jo tujh ko bulaata hay yeh thag hay maar hi rakhe gaa,
Haaye musaafir dam mein na aana mat kaisi matwaali hay.
Sona paas hay soona ban hay sona zehar hay utth pyaare,
Tu kehta hay neend hay meethi teri mat hi nirali hay.
Aankhain malna jhunjhlaa parrnaa laakhon jamaahi angraayi,
Naam pe utthne key larrta hay utthna bhi kuch gaali hay.
Jugnoo chamke pattaa kharke mujh tanhaa ka dil dharke,
Dar samjhaaye koi pavan hay ya agiyaa be taali hay,
Baadal garje bijli tarrpe dhak sey kaleja ho jaaye,
Ban main ghataa ki bhayanak soorat kaisi kaali kaali hay.
Paaon utthaa aur thokar khaayi kuch sambhlaa phir aondhe moon,
Meenh ne phislan kar di hay aur dhur tak khaayi naali hay.
Saathi saathi keh key pukaroon saathi ho to jawab aaye,
Phir jhunjhlaa kar sar de patkoon chal re Mowla waali hay.
Phir phir kar har jaanib dekhoon koi aas na paas kahin,
Haan ik tooti aas nay haaray jee say rafaaqat paali hay.
Tum to chaand ‘arab key ho pyaare tum to ‘ajam key sooraj ho,
Dekho mujh bekas par shab ne kaisi aafat daali hay.
Dunya ko tu kia jaanay yeh bis ki ghaanth hay harraafah,
Soorat dekho zaalim ki to kaisee bholi bhaali hay.
Shehad dikhaaye zehar pilaaye qaatil daaen shohar kush,
Iss murdaar pe kya lalchaaya dunya dekhi bhaali hay.
Woh to nihayat sasta sowda baich rahe hain jannat ka,
Hum muflis kya moal chukaayen apna haath hi khaali hay.
Mowla tere afw-o-karam hon mere gawaah safaayi key,
Warna RAZA sey chor pe teri digree to iqbaali hay.