69. UTHAA DO PARDA DIKHAA DO CHEHRA
Uthaa do parda dikhaa do chehra key Noor-e-Baari hijaab mein hay,
Zamaana taareek ho raha hay key mehr kab sey niqaab mein hay.
Nahin woh meethi nigaah waala Khuda ki rehmat hay jalwa farma,
Ghazab sey unke Khuda bachaaye jalaal-e-baari ‘etaab mein hay.
Jali-jali bu sey uski paida hay sozish-e-‘ishq-e-chashme-waala,
Kabaab-e-aahu me bhi na paaya mazah jo dil key kabaab mein hay.
Unheen ki bu maaya-e-saman hay unheen ka jalwa chaman chaman hay,
Unheen sey gulshan mehek rahe hain unheen ki rangat gulaab mein hay.
Teri julu mein hay maah-e-Taibah hilaal har marg-o-zindagi ka!,
Hayaat jaa(n) ka rikaab mein hay mamaate aa’da ka daab mein hay.
Siyaah libaasaan-e-daar dunya wa sabz-poshaan-e-‘arshe aa’laa,
Har ik hay unke karam ka pyaasa ye faiz unki janaab mein hay.
Woh gul hay lab-haaye naazuk unke hazaaron jharte hain phool jinse,
Gulaab gulshan mein dekhe bulbul yeh dekh gulshan gulaab mein hay.
Jali hay soz-e-jigar sey jaa(n) tak hay taalib-e-jalwa-e-mubaarak,
Dikha do wo lab key aab-e-haiwaa(n) key lutf jinke khitaab mein hay.
Khare hain Munkar Nakeer sar par na koi haami na koi yaavar!,
Bataa do aakar mere Payambar key sakht mushkil jawaab mein hay.
Khuda-e-qahhaar hay ghazab par khule hein bad-kaariyo(n) key daftar,
Bachaa lo aa kar shafi’-e-mehshar tumhaara bandah ‘azaab mein hay.
Kareem aisa mila key jiske khule hain haath aur bhare khazaane,
Batao aay mufliso! keh phir kyun tumhaara dil izteraab mein hay.
Gunaah ki taareekiyaan ye chaayien umand key kaali ghataaein aaein,
Khuda kay khursheed mehr farmaa key zarra bas izteraab mein hay.
Kareem apne karam ka sadqa la-eeme be qadr ko na sharmaa,
Tu aur RAZA sey hisaab lena RAZA bhi koi hisaab mein hay.