25. SABA YE KAISI CHALI AAJ DASHT-E-BATHAA SE
Saba ye kaisi chali aaj dasht-e-bathaa se
Umang shouq ki uthi hay qalb-e-murdah se.
Na baat mujh se gul-e-khuld ki kar ay zaahid
Ke mera dil hay nigaar khaar-e-zaar-e-taybah se.
Ye baat mujh se mere dil ki keh gaya zaahid
Bahaar-e-khuld-e-bareeN hay bahaar-e-taybah se.
Ye kis ke dam se mili hai jahaaN ko taabaani
Mah-o-nujoom haiN roshan minar-e-taybah se.
FidaeeyoN ko ye zid kya ke pardah uth jaaye
Hazaar jalwey numaayaaN hijaab-e-Aaqa se.
Jo hai mareez-e-mohabbat yahaaN chaley aaeN
Sadaa ye aati hai sunn lo mazaar-e-Maulaa se.
Kinaara ho gaya paida usi jagah fouran
Kabhi jo ham ne pukaara meyaan-e-daryaa se.
Na faiz-e-raah-e-mohabbat meiN tu ne kuch paaya
Kinaara kyuN nahiN karta tu ahl-e-dunya se.
Pas-e-mamaat na badnaam ho tera AKHTAR
Ilaahi is ko bachaa lena taa’an-e-’aadaa se.